Алишер Усмонов номзоди яна Халқаро қиличбозлик федерацияси президентлигига илгари сурилди

Россия қиличбозлик федерацияси мазкур сайловга мамлакат номидан FIEнинг амалдаги раҳбари, россиялик меценат Алишер Усмоновнинг номзодини илгари сурди. Шу тариқа, 27 ноябрь куни Швейцарияда ўтказиладиган FIEнинг Конгрессида Усмонов номзоди кўриб чиқилади.

Асли келиб чиқиши ўзбекистонлик бўлган Алишер Усмоновни ҳамюртларимиз ҳам яхши билишади. Зеро, у мамлакатимизда ҳам ижтимоий соҳа ва спортни қўллаб-қувватлаш бўйича бир неча йирик лойиҳаларни амалга оширган.

Таъкидлаш жоиз, сентябрь ойида мамлакатимизда ўтган Осиё, Пан Америка ва Африка қиличбозлик конфедерацияларининг конгрессида ҳар уч минтақа Алишер Усмоновга бўлажак сайловда уни қўллаб-қувватлашини билдирувчи хат йўллаган эди.

Маълумот учун, Алишер Усмонов 2008 йилдан бери ушбу халқаро ташкилотни бошқариб келмоқда. У FIEга 2012 ва 2016 йилларда қайта сайланган.