Американи титратаётган ўзбек ўғлони ёхуд Фёдор Емеляненко эътрофидаги "Қора бўри"

У спорт журналисти эканлигимдан хабар топгандан сўнг, Мурод Чориев исмли ҳамюртимиз АҚШ октагонларида аралаш қоидалар бўйича жанг санъати, яъни ММА йўналишида яхши натижаларни қайд этаётганлигини ва унинг фаолиятига қизиқиб кўришимни тавсия қилди. Шундан сўнг, бу борада изланишлар олиб бориб, ушбу спортчи 1998 йил Қашқадарёнинг Шаҳрисабз шаҳрида таваллуд топганлигини, 12 ёшидан буён Америка Қўшма Штатларида истиқомат қилаётганлиги, самбо ва дзюдо билан ёшлигидан бери шуғулланиб келиши, 16-17 ёшидан ММА турнирларида иштирок эта бошлаганлигини аниқладим. Ҳозирги кунга келиб Мурод Чориев -73 кг вазн тоифасида 7 та жанг ўтказиб, барчасида ғалаба қозонган. Қувонарлиси, у жангларнинг барчасини муддатидан аввал нокаут билан якунлаган! Яна бир эътиборга молик жиҳати, ММА оламида "Сўнги император" номи билан машҳур Фёдор Емеляненконинг шахсан ўзи ҳамюртимизга "Қора бўри" номини берган экан! Ушбу спортчимиз ва унинг промоутери билан бўлган сухбатни яқин кунларда эътиборингизга хавола этамиз.

Аҳмадбек Эшматов