Андижон вилояти ҳокими янги ташкил этилган халқаро спорт федерацияси раҳбарига айланди

Ушбу лавозимга Андижон вилояти ҳокими Шуҳрат Абдураҳмонов номзоди лойиқ кўрилди. Бу ҳақда ҳоким матбуот хизмати хабар берди.

Йиғилишда Ойбек Наринбоев Осиё Баҳодирлар ўйинлари ва тош кўтариш федерациясининг фахрий президенти этиб сайланди. БАА вакили Владислав Редкин биринчи вице-президент, ҳиндистонлик Картик Ваада ҳамда ҳамюртимиз, баҳодирлар ўйини ва тош кўтариш спорт турини юртимизда оммалашишига катта ҳисса қўшиб келаётган фахрийлар ўртасида жаҳон чемпиони Воҳиддин Нажмидинов вице-президент этиб сайланишди.

"Шуҳратбек Абдураҳмонов Баҳодирлар ўйинларининг Осиё федерацияси президенти этиб сайланди. Хонобод шаҳрида ташкил этилган "Etno strongman games" (Баҳодирлар ўйинлари) бўйича Жаҳон кубоги ва тош кўтариш бўйича Жаҳон чемпионати доирасида Осиё Баҳодирлар ўйинлари ва тош кўтариш федерациясининг таъсис конференцияси ўтказилди. 

Муқаддам Осиё минтақасида спортнинг мазкур йўналиши бўйича федерация мавжуд бўлмай келган. Осиёнинг қатор давлатларидаги ушбу спорт йўналиши вакиллари ва спортчилар иштирок этган таъсис конференциясида Андижон вилояти ҳокими Шуҳратбек Абдураҳмонов Осиё Баҳодирлар ўйинлари ва тош кўтариш федерациясининг президенти этиб сайланди", дейилади хабарда.