АҚШ шарафини ҳимоя қилувчи шахматчимиз Гулруҳбегим ҳам Самарқандга етиб келди + ФОТО

Бугун жаҳон чемпионатининг тантанали очилиш маросими бўлиб ўтади. Мусобақада қатнашувчи гроссмейстерларнинг эса қўҳна шаҳарга ташрифи давом этмоқда. Жумладан, АҚШ шарафини ҳимоя қилаётган ҳамюртимиз Гулруҳбегим Тоҳиржонова ҳам жамоадоши билан биргаликда Самарқандга етиб келди ва ўз инстаграмига "Регистон" майдонидан сурат жойлади. 

Эслатиб ўтамиз, Гулруҳбегим яқинда АҚШ чемпионатида кумуш медаль ҳамда мукофот пули сифатида 30 000 долларни қўлга киритганди. Тоҳиржонова 12 тур якунларига кўра 8 очко билан иккинчи ўринни эгаллаганди. Ҳамюртимиз сўнгги партияда имкониятни бой бермаганида АҚШ чемпионига айланган бўларди. 

Маълумот учун, Самарқанддаги жаҳон чемпионатининг умумий мукофот жамғармаси 1 миллион долларни ташкил этади. Рапид йўналишида 500 000 доллар (эркаклар 350 000, аёллар 150 000), блиц йўналишида ҳам 500 000 доллар (эркаклар 350 000, аёллар 150 000) пул мукофоти ажратилган.