Арман Царукян йил охиригача дисквалификация қилинди

Узоқ муддатли дисквалификацияга унинг мухлисни ургани сабаб бўлди. Арман Лас-Вегасда ўтган UFC 300 турнири доирасида бразилиялик Чарльз Оливейрага қарши октагонга чиққанди. Даъвогарлар жангида Царукян ғалаба қозонганди. Октагонга чиқиб келишда Царукян мухлислардан бирига мушт туширганди. 

Кеча Невада штати Атлетик комиссияси воқеани ўрганиб чиқди ва россиялик аралаш яккакураш устасини 9 ойга четлатишга қарор қилди. Жазо муддати 2025 йилнинг 12 январь куни якунига етади. Камига у 25 000 доллар миқдорида жарима ҳам тўлайди.

Шу тариқа, Ислам Махачевнинг октябрь ойига мўлжалланаётган жангдаги рақиби ўзгаради. Айнан Царукян Исламнинг камарига расмий даъвогар эди. Лекин Арман учун кичик хушхабар ҳам бор. Атлетик комиссия дисквалификация муддатини 6 ойга тушириши ҳам мумкин. Бунинг учун россиялик жангчи безориликка қарши курашиш ижтимоий дастурида иштирок этиши керак. Бу ҳолатда унинг жазо муддати 13 октябрь куни якунига етади. Бу эса унга 26 октябрь куни Абу-Дабида ўтадиган UFC 308 турнирида иштирок эта олади.