Артур Григорянга илк мағлубиятни тақдим этган боксчи 50 ёшида фаолиятини якунлади

Ўша жангда чарм қўлқоп устамиз енгил вазн тоифасида ўзига тегишли WBO чемпионлик камарини 18-маротаба ҳимоя қилиш учун рингга кўтарилганди. Унгача Артурнинг деярли барча жанглари Германияда ўтказилган эди. 

Афсуски, илк бор АҚШда жанг қилган Григорян ўн икки раунд тўлиқ давом этган чемпионлик жангида ёш Аселино Фрейтасга очколар ҳисобига кўра имкониятни бой бериб қўйганди. Бразилиялик боксчи ҳакамларнинг якдил қарори билан 115:108, 116:107, 116:107 ҳисобида ғалаба қозониб, Григоряндан WBO чемпионлик камарини тортиб олганди.  

Икки вазнда собиқ жаҳон чемпиони Аселино Фрейтас 50 ёшида фаолиятини якунлаганини эълон қилди. У ҳатто кўргазмали жанглар учун ҳам рингга қайтмаслигини айтмоқда. 

Фрейтас боксдан кетиш сабабларидан бири сифатида яқинда Вандерлей Сильва билан бўлиб ўтган жангдаги жанжални келтирган. Жанг якунида рингда ҳар икки боксчи жамоалари ўртасида жанжал келиб чиққанди. "Бу мен учун қанчалик шармандалик бўлганини тасаввур ҳам қилолмайсиз. Рингда бошдан кечирганларимнинг барчасидан ўтиш, бошқа жангчини алмаштириш - бу пул учун эмас, менга пул керак эмас, шунчаки тадбир барбод бўлмаслиги учун. Сильванинг мураббийи рингга чиқиб, мени қаттиқ урганида, бу хўрликни бошдан кечириш. Мен учун бу жангчи сифатида бошимдан кечирган энг ёмон хўрликлардан бири эди. Бугун бу ерда туриб, бутун Бразилияга мурожаат қилишимнинг сабабларидан бири ҳам айнан шу воқейликдик", - деди Фрейтас промоутер сифатида иштирок этаётган бокс оқшомига бағишланган матбуот анжуманида.