Атлетларимиз бодибилдинг, фитнес ва мас-рестлинг бўйича Осиё чемпионатидан қайтишди

Унда қитъамизнинг 38 та давлатидан 250 нафарга яқин атлет ғолиблик учун баҳс олиб боришди.

Ушбу мусобақада Хитой, Жанубий Корея, Япония, Индонезия, Филиппин, Малайзия, Хитой Тайпейи, Ҳиндистон, Покистон, Таиланд, Сингапур, Шри-Ланка сингари Осиёнинг етакчи давлатларидан келган спортчилар медаллар учун курашга киришди.

Осиё чемпионатининг якуний натижаларига кўра Ўзбекистон терма жамоаси аъзолари иккитадан олтин ва бронза, жами 4 та медалга сазовор бўлди. Жумладан, эркаклар ўртасида Достон Ҳасанов атлет йўналишида олтин, Павел Умурзаков эса бодибилдинг йўналишида бронза медалини қўлга киритган бўлса, аёллар ўртасидаги баҳсларда Рушана Максумова фитнес модель йўналишида олтин, яна бир вакиламиз Анжелина Осипян эса фитнес модель йўналишида бронза медалини қўлга киритди.

Норасмий умумжамоа ҳисобида вакилларимиз бодибилдинг, фитнес ва мас-рестлинг йўналишида 38 та давлат орасида фахрли 3-ўринни эгаллади. Бу борада Таиланд энг яхши натижа кўрсатган бўлса, иккинчи поғонадан мўғулистонлик атлетлар жой олишди.

Ҳозиргина Ўзбекистон спорт делегацияси Куала-Лумпур – Тошкент йўналиши бўйлаб юртимизга етиб келди ва Ислом Каримов номидаги Тошкент халқаро аэропортига келиб қўнди. Мазкур Осиё чемпионатида жами 9 нафар атлетимиз Ўзбекистон шарафини ҳимоя қилишган бўлса, шулардан тўрттаси якунда совриндорга айланишди.

Тошкент халқаро аэропортида атлетларимизни Жисмоний тарбия ва спорт вазирининг биринчи ўринбосари Ойбек Касимов, Ўзбекистон бодибилдинг, фитнес ва мас-рестлинг федерацияси раиси Одил Абдураҳмонов, вазирлик ҳамда федерация ходимлари, шунингдек спортчиларнинг оила аъзолари ва оммавий ахборот воситалари ходимлари тантанали кутиб олишди.

Достон Ҳасанов (Осиё чемпиони) – Албатта, қитъа чемпионатида ғалаба қозонишнинг ўзи бўлмади. Аммо, машғулотлардаги машаққатли меҳнатларимиз бесамар кетмади, юртимизга ёруғ юз билан қайтдик. Муваффақиятларимиз замирида Ўзбекистонда жисмоний тарбия ва спортни ривожлантиришга ҳукуматимиз даражасида берилаётган эътибор ётибди, десам асло муболаға бўлмайди. Фурсатдан фойдаланиб, камтарона меҳнатларимизни юксак даражада қадрлаб, тантанали тарзда кутиб олишгани учун вазирлик ҳамда федерация раҳбариятига миннатдорлик билдираман.