Australian Open. 16 ёшли Андреева 4-босқичда, у ҳал қилувчи сетда 1/5 ҳисобидан чиқиб кетди

Australian Open мусобақасининг аёллар ўртасидаги баҳсларида учинчи давра учрашувлари ўтказиляпти. WTA рейтингида 47-ўринни эгаллаб турган Мирра Андреева муқаррар мағлубиятдан чиқиб кета олди. Россиялик 16 ёшли иқтидор эгаси рейтингнинг 72-поғонасида бораётган франциялик Диана Паррини уч сет натижасига кўра таслим этди - 1/6, 6/1, 7/6(10:5).

Эътиборга молик жиҳати шундаки, Андреева ҳал қилувчи учинчи сетда 1/5 ҳисобида ютқазаётганди. У 2/5 ҳисоби қайд этилаётганда матч-боллдан чиқиб кетди ва якунда баҳсни ўз фойдасига ҳал қилди. Теннисчиларнинг ўзаро иккинчи учрашувида ҳам Мирра рақибасидан устун келди.  

Икки соату 25 дақиқа давом этган баҳсда Андреева 5 та эйсни амалга ошириб, 4 та қўшхатога йўл қўйди. Иккала теннисчи ҳам 5 тадан брейкка эришишди. Мирра ўз фаолиятида иккинчи бор "Катта Дубулға" турнирининг тўртинчи босқичига йўл олди. У "Уимблдон-2023"да ҳам ушбу босқичга етиб келган эди.