Australian Open 2026. Иккинчи ракеткамизнинг саралаш турниридаги рақибаси маълум

Ўз тарихида 114-маротаба ташкил этиладиган, умумий мукофот жамғармаси рекорд даража - 111,5 миллион АҚШ долларига етказилган Австралия Очиқ чемпионатининг аёллар ўртасидаги саралаш турнирида биргина вакиламиз Мария Тимофеева юртимиз шарафини ҳимоя қилади. 

Қуръа натижасига кўра, Тимофеева саралашнинг биринчи босқичда япониялик 26 ёшли Маи Хонтамага қарши кортга чиқадиган бўлди. Кунчиқар юрт вакиласи ҳозирда WTA рейтингида 242-поғонадан жой олган. Ўзбекистоннинг иккинчи ракеткаси бўлиб турган Тимофеева эса 138-ўринни банд этган. 

Australian Open 2026 турнирининг асосий тўрига йўлланма олиш учун учта учрашувда ғолиб чиқиш талаб этилади. Мария Маи Хонтама тўсиғидан ўтиб олса, иккинчи даврада франциялик Манон Леонард ва яна бир япон теннисчиси Ҳимено Сакатсуме учрашуви ғолибасига қарши баҳс олиб боради.