Азиз Абдуҳакимов: «Мусобақаларда таниш-билишчиликка чек қўйиш учун онлайн платформа яратилади»

Президент жума куни Париж Олимпиадасига ҳозирдан тайёргарлик кўриш кераклигини айтиб, энг муҳим вазифаларни белгилаб берди, деди бош вазир ўринбосари, туризм ва спорт вазири Азиз Абдуҳакимов «Газета.uz » мухбири билан суҳбатда.

«Мусобақаларда таниш-билишчиликка чек қўйиш бўйича аниқ топшириқ берилди. Яъни тегишли онлайн платформа яратилади. Айнан пастдан турли мусобақаларда яхши натижаларни кўрсатган спортчилар вилоят ва республика босқичида қатнашадиган тизим ишлаб чиқилади», — деди вазир.

Унинг сўзларига кўра, платформа орқали исталган фуқаро мусобақалар қандай ташкил этилаётганини кўра олади. «Энди биз мусобақаларда ким қатнашаяпти, олдин қанақа натижаларга эга бўлган, нимага кучли спортчилар иштирок этмаяпти, деган саволларга жавоб топа оламиз», — деди у.