Баҳодир полвон Бекчанов хонадонига ташриф

Бу инсон вақтида эркин кураш, юнон-рум кураши, самбо ҳамда кураш билан шуғулланиб, қатор ютуқларни қўлга киритган эди. Кейинги пайтларда мураббий сифатида воҳалик ёш спортчиларни етуклик сари етаклаб, улар орасидан таниқли курашчилар етишиб чиқишига муносиб улушини қўшди. 

Кўплаб Ўзбекистон ва халқаро миқёсидаги мусобақаларда ҳакамлик қилди. Албатта, фидоий инсоннинг беминнат меҳнатлари беэътибор қолмади. Ўзбекистонда хизмат кўрсатган спорт устози унвонига, “Эл-юрт ҳурмати” орденига сазовор бўлди. Айни дамда, у нафақада.

Яқинда спортимиз жонкуяри Ўзбекистон Республикаси жисмоний тарбия ва спорт вазирлиги томонидан “Жисмоний тарбия ва спорт аълочиси” кўкрак нишони билан тақдирланди. Албатта, бу ҳам Б.Бекчановнинг спорт соҳасидаги, уни ривожи йўлидаги кўп йиллик самарали хизматлари эвазига берилган муносиб рағбат эди.

Куни кеча Хоразм вилояти жисмоний тарбия ва спорт бошқармаси бошлиғи  Ш.Мадаминов, Урганч ихтисослаштирилган олимпия захиралари мактаб-интернати директори И.Отаев, Ўзбекистон талабалар спорти ассоциацияси вилоят минтақавий бўлими раиси ўринбосари М.Қаландаров ва  спорт федерациялар  ҳамкорлигида хайрли ишга қўл уришди. Баҳодир полвон Бекчановнинг уйига ташриф буюриб, унинг ҳолидан хабар олинди. Бу галги ташриф чоғида спортимизнинг эъзозли фахрийсига ҳурмат ва эҳтиром рамзи сифатида вилоят жисмоний тарбия ва спорт бошқармасининг фахрий ёрлиғи топширилди. 

Фурсатдан фойдаланиб, дилкаш инсон билан дилдан суҳбат қурилди,  устоз асос солган уй музейига қўйилган  экспонатлар, сурат, медаль ва бошқа турдаги коллекцияларни томоша қилишди. Асосийси, бу ташрифдан Баҳодир полвоннинг қувончи кўкларга етди. 

Икром ХУДОЙБЕРГАНОВ, Урганч шаҳридан