“Баркамол авлод-2017”. Илк медаллар сузиш спорти усталарида

“Сўғдиёна” универсал спорт мажмуасида “Баркамол авлод-2017” саралаш босқичларидан муваффақиятли ўтган энг сара спортчилар брасс, чалқанча, баттерфляй, эркин ҳамда аралаш эстафета усулларида сузиш бўйича ўзаро куч синашдилар.

Қизлар ўртасида 50 метрга баттерфляй усулда сузиш баҳсларида қашқадарёлик Фотима Амилова марра чизиғини биринчи бўлиб кесиб ўтиб, олтин медаль соҳиби бўлди. Шу масофага ўсмирлар ўртасидаги мусобақада андижонлик Зуфар Абдулазизов биринчи ўринни эгаллади.

Ўсмирлар ва қизлар ўртасида 50 метрга чалқанча усулда сузиш баҳсларида пойтахтлик спортчилар Алексей Тарасенко ва Ирина Ушакова шоҳсупанинг юқори поғонасидан жой олди.

100 метрга баттерфляй усулда сузишда қизлар ўртасида қорақалпоғистонлик Маржина Ўразимбетова, ўсмирлар баҳсида пойтахтлик Артём Козлюк энг яхши натижа қайд этди.

Қизлар ўртасида 200 метрга эркин усулда сузиш баҳсларида андижонлик Шаҳноза Содиқова, ўсмирлар ўртасида Навоий вилояти вакили Олимжон Одилов ғолиб чиқди. Қизлар ўртасида аралаш эстафета мусобақасида Қашқадарё вилояти, ўғил болалар ўртасида Тошкент шаҳри жамоаси биринчи ўринни қўлга киритди.

Сузиш бўйича мусобақаларнинг биринчи куни натижаларига кўра, энг кўп очко жамғарган Тошкент шаҳри жамоаси биринчи, андижонлик ёшлар иккинчи, кашқадарёлик спортчилар учунчи ўринни эгаллашди.