Бекзод Абдураҳмонов: «Парижда бронзани олтинга айлантираман»

Мукофот олганлар орасида эркин кураш бўйича Ўзбекистон терма жамоаси аъзоси, Токио-2020 Олимпиадасининг бронза медали совриндори Бекзод Абдураҳмонов ҳам бор. Спортчилар оиласидан бўлган Абдураҳмонов «Ўзбекистон Республикасида хизмат кўрсатган спортчи» фахрий унвонига лойиқ кўрилди. 

«Олимпия ўйинлари бошқа мусобақалар, хусусан жаҳон ва қитъа чемпионатларидан анча юқорида туришига, савияси баланд эканига бевосита ўз иштироким натижасида амин бўлдим», - дейди Абдураҳмонов. - «Ҳурматли Президент, шахсан сизнинг қўллаб-қувватлашингиз, пандемия ҳолатига қарамай, биз учун барча шароитларни муҳайё қилиб берганингиз сабабли Токиода яхши натижаларга эриша олдик деб ўйлайман. Японияда Ўзбекистон тарихидаги иккинчи энг яхши натижани кўрсатдик. Насиб қилса, Парижда бронза медалларни олтинга айлантирамиз. Олимпиаданинг савия ва даражаси, у ердаги ҳарорат мен кутганимдан ҳам юқори экан. Ҳар бир спортчи нафақат ўзи, балки оиласи, яқинлари, Ватани шаънини ҳимоя қилиш учун ҳаракат қилади. Ўз ўрнида мен ҳам бутун мусобақа давомида ортимда 34 миллионлик халқим, ота-онам, яқинларим, оила аъзоларим ва Сиздек Президентим борлигини дилдан ҳис қилиб турдим. Президентим ва халқимнинг ишончи менга қўшимча куч берди. Фурсатдан фойдаланиб, биз спортчиларга қаратаётган эътиборингиз учун миннатдорлик изҳор қиламан. Самолётдан тушишимиз билан бизга Президент совғаси сифатида уй ва машина беришди. Бунинг учун яна бир бор раҳмат айтаман. Аслида мен спортчилар оиласиданман. Акам ҳам спортчи бўлган, у ҳозир менинг мураббийим. Отам ҳам кураш тушганлар. Бўлажак рафиқам Нигора Турсунқулова таэквондо спорт туридан иккита Олимпиадада қатнашди».