Бекзод Абдураҳмонов ва Ғуломжон Абдуллаев 1/2 финалда, Жалоловда бронза учун имконият бор

Ўзбекистон эркин кураш терма жамоасининг 6 нафар вакили мусобақа медаллари ҳамда муҳим рейтинг очколари учун баҳсларга киришганди. Улардан Токио Олимпиадаси совриндори Бекзод Абдураҳмонов ҳамда олимпия ўйинлари иштирокчиси Ғуломжон Абдуллаев ярим финал йўлланмасини қўлга киритишди. 

Вазнини 12 килограммга кўтариб, 86 кг вазн тоифасидаги беллашувларда илк бор қатнашаётган Абдураҳмонов нимчорак финалда қозоғистонлик Максат Сатибалдини 9-4, чорак финалда грузиялик Тарзан Майсурадзени 8-1 ҳисобида енгди. Унинг ярим финалдаги рақиби туркиялик Осман Гочен бўлади. Бекзод декабрь ойида айнан шу вазнда Ўзбекистон чемпиони бўлган эди. 

Шунингдек, Токио Олимпиадасининг яна бир иштирокчиси Ғуломжон Абдуллаев ҳам ўзи учун янги вазнда ярим финалга етиб келди. Абдуллаев туркиялик Режеп Топални 7-4, озарбайжонлик Ислам Базаргановни 3-2, қозоғистонлик Акбар Курбановни 7-3 ҳисобида мағлубиятга учрата олди. Бироздан сўнг ярим финалда қирғизистонлик Улуғбек Жолдошбековга қарши гиламга чиқади. 

Қизиғи, 65 кг вазндаги икки курашчимиз Аббос Раҳмонов ва Умиджон Жалолов 1/8 финалдаёқ бир-бирлари билан тўқнаш келишди. Жалолов илк квалификация баҳсида озарбайжонлик Али Раҳимзодадан устун келди. Икки юртдошимизнинг муросасиз кечган учрашувида эса Жалолов Рио Олимпиадаси иштирокчиси бўлган Раҳмоновни 9-8 ҳисобида енгди. Аммо, ярим финал остонасида Умиджон россиялик Шамил Мамедовга ютқазиб (0-4) қўйди. 

Ушбу вазндаги учинчи вакилимиз Нодир Раҳимов эса илк саралаш босқичида руминиялик Николай Охлопковга имкониятни бой берди. 74 кг вазнда юртимиз шарафини ҳимоя қилган Асомиддин Ҳасанов Притам Притам (Ҳиндистон) тўсиғидан ўта олмади.