Бензема янги шартнома сабаб "Ал-Иттиҳод"да ўйнашни тўхтатди

"Ал-Иттиҳод" жамоаси ҳужумчиси Карим Бензема янги шартнома бўйича келишмовчиликлар туфайли клуб сафидаги ўйинларда қатнашишни вақтинча тўхтатди. 

Манбага кўра, Саудия Арабистони клуби раҳбарияти 38 ёшли француз футболчисига янги шартнома таклиф қилган, бироқ унда маош ҳозирги келишувга нисбатан анча камайтирилган. Бенземанинг амалдаги шартномаси 2026 йил июнь ойида якунланади.

Аввалроқ журналист Танкреди Палмери маълум қилишича, ҳозирги келишувга биноан Бензема йилига 200 миллион евро маош олади.

Карим Бензема "Ал-Иттиҳод" сафига 2023 йилда қўшилган ва 2025 йилги мавсумда жамоа билан мамлакат чемпиони бўлган. Футболчининг фаолиятининг катта қисми (2009–2023 йиллар) Мадриднинг "Реал" клубида ўтган. У ерда Бензема 648 та ўйин ўтказиб, 354 та гол урган ҳамда беш марта Чемпионлар лигасида ғалаба қозонишни ўз ичига олган кўплаб совринларни қўлга киритган. 2022 йилда эса у дунёнинг энг яхши футболчиси сифатида "Олтин тўп" мукофотига сазовор бўлган.