Беш соат ичида икки учрашувда ғалаба қозонган Султонов Португалия турнири финалида!

Мукофот жамғармаси 25 000 АҚШ долларини ташкил қилувчи ушбу мусобақада мамлакатимизнинг биринчи ва иккинчи ракеткалари Ҳумоюн Султонов ҳамда Сергей Фомин ҳам иштирок этяпти. Фомин яккаликнинг 1/4 финалида бўлажак финалчи, испаниялик Мартин Ландалусега 1/6, 6/7, тай-брекда 10:12 ҳисобида имкониятни бой берганди.

Кеча Фомин ва Султонов биргаликда жуфтлик баҳсида ҳам кортга чиқишди ва португалиялик теннисчиларга ютқазиб қўйишди. Ҳумоюн жуфтликдан ташқари яна иккита яккалик учрашувида ҳам кортга чиқди ва ҳар иккисида ҳам ғалаба қозониб, мусобақанинг финалига йўл олди.    

Султонов аввалига 1/4 финалда испаниялик Карлос Лопес Монтагудни қийинчилик билан 7/6(7), 5/7, 7/6(4) ҳисобларида мағлуб этди. Ярим финал учрашувида эса бразилиялик Каруе Селлдан ортиқча қийинчиликсиз устун келди - 6/3, 6/0. 

Бугун ҳамюртимиз мусобақа бош соврини учун Мартин Ландалусега қарши кортга чиқади. Испаниялик бу теннисчи чорак финалда Сергей Фоминни ютганди. Султонов - Ландалусе баҳси бизнинг вақт билан соат 17:00да бошланади. 

Таққослаш учун, турнирда тўртинчи рақам остида таснифланган Султонов ATP рейтингида 354, Монтагуд 430, Селл 666, Ҳумоюннинг финалдаги рақиби Ландалусе 465-поғонани эгаллаб турибди.