“Беш ташаббус олимпиадаси ва Паралимпиадаси”нинг 2026 йилги мавсуми старт олди

Маросимида Ўзбекистон Республикаси Президентининг спорт бўйича вакили Одил Абдураҳмонов, Ўзбекистон Республикаси Президенти маслаҳатчиси, Ижтимоий ҳимоя миллий агентлиги директори Мансур Оллоёров, Спорт вазири Адҳам Икрамов, Мактабгача ва мактаб таълими вазири Эъзозхон Каримова, Рақамли технологиялар вазири - Бош Ахборот Директори (CIО) Шерзод Шерматов, Ўзбекистон Республикаси Давлат хавфсизлик хизмати раиси ўринбосари Жаҳонгир Жўраев, Ўзбекистон маҳаллалари уюшмаси раиси Қаҳрамон Қуронбоев, Ёшлар ишлар агентлиги директори Алишер Саъдуллаев, Миллий Олимпия қўмитаси раисининг биринчи ўринбосари Отабек Умаров, Ўзбекистон Миллий Паралимпия қўмитаси раиси Мухторхон Ташходжаев иштирок этди.

Тадбирда Спорт вазири Адҳам Икрамов муҳтарам Президентимиз ташаббуслари билан йўлга қўйилган бу тизим, қисқа фурсатда умуммиллий ҳаракатга айланиб улгурганлигини, ўтган йил ташкил этилган оммавий спорт мусобақаларида 15 миллион аҳоли катта қизиқиш билан фаол иштирок этганлигини таъкидлади.

Сўзга чиққан Мактабгача ва мактаб таълими вазири Эъзозхон Каримова таълим муассасаларида оммавий спорт ривожига қўшган муносиб ҳиссаси учун Спорт вазири Адҳам Икрамовни “Халқ таълими аълочиси” кўкрак нишони билан тақдирлади.

Шундан сўнг, “Беш ташаббус олимпиадаси ва Паралимпиадаси” лойиҳаларининг2026 йилги мавсумига старт берилди. Тантанали тадбирда вилоят студияларидан маҳалла еттилиги, “Беш ташаббус олимпиадаси”нинг аввалги мавсум ғолиб ва совриндорлари, ёшлар, олий таълим муассасалари талабалари, умумтаълим мактабларининг юқори синф ўқувчилари, таниқли спортчилар ва маданият ходимлари, шунингдек, ҳамкор вазирлик, идора ва ташкилотлар ходимлари фаол қатнашди.