Бетербиев 38 ёш бўлишига қарамай барчани «ухлатиб қўймоқда». Навбат Биволга…

Жанг масаласи 7-раундда ҳал бўлди. Бетербиев Смитни бурчакка қисиб, тинимсиз зарбалар орқали нокаут эвазига таслим этди. Икки боксчи ўртасидаги жанг дастлаб 2023 йилнинг август ойига режалаштирилган эди, бироқ Артурнинг тиш операциясидан сўнг жағида инфекция пайдо бўлганлиги сабабли жанг қолдирилди. 2024 йил январь ойида Бетербиевнинг тести «атипик» натижаларни кўрсатгач, баҳс яна бир бор бекор қилиниши мумкин эди. Лекин, қўшимча тестлар салбий чиққанди. 

«Шуни айтмоқчиманки, мен соф жангчиман. Фаолиятим давомида бирор маротаба тақиқланган моддалар истеъмол қилмаганман. Бунинг аксини исботлашга уриниш туҳмат ҳисобланади. Бундай гаплар шунчаки ўринсиз», деди Бетербиев дарҳол бу каби гап-сўзларга. У охирги маротаба 2023 йилнинг январида Энтони Ярдни 8-раундда нокаут ҳисобига таслим этганидан буён рингга кўтарилмаётганди. Смит ҳам бир ярим йилдан сўнг яна рингга қайтди. У сўнгги бор 2022 йилнинг август ойида Матйо Бодерлик билан тўқнаш келиб, уни 4-раундда нокаутга учратганди. Ушбу жанг Каллум учун мазкур вазн тоифасидаги иккинчи жанг эди. Бунга қадар у суперўрта вазнда бокс тушиб келган ва WBA чемпионига айланган, аммо камарини Саул Альваресга бой бериб қўйган эди.

Қоғозда Смит ёши ва антропометрияси бўйича жиддий устунликка эга эди, бироқ Бетербиевнинг рекорди даҳшатлироқ кўринди – 19 ғалаба ва барчаси нокаут. Смитнинг рекорди бўлса, 29-1, унинг кучли зарба соҳиби эканлигига қарамай, ғалабаларининг атиги 72 фоизи муддатидан аввал поёнига етган. Якунда барча факторларни четга сурган ҳолда Артур рақибини 7-раундда ринга қулатишга муваффақ бўлди. Чеченистонлик боксчи илк сонияларданоқ олдинга ошиқди ҳамда рақибини ринг арқонларига қисиб қўйди. Британиялик спортчи бўлса, рингни айланиб, зарба учун қулай имкониятни кутди, лекин Бетербиев унинг эркин ишлашига деярли йўл қўймади. 

Смит антропометриядаги устунлигидан унумли фойдаланмади ва рақибини узоқ ушлай олмай, яқин жанг қилишни афзал кўрди. У Артурнинг ҳужумларига дош бериб, жавоб ҳужумига отилди, аммо зарбалар чеченистонликнинг блокларидан нарига ўтмади. Учинчи раундга келиб, Каллум ўтказиб юборилган зарбалар таъсирида бироз ўзини йўқотишни бошлади. Танаффус вақтида британияликнинг мураббийи қарши зарба беришни кутмасдан, тана устида кўпроқ ишлашни маслаҳат берди. Бу услуб унга қисман устунликни тақдим этди, лекин Бетербиевга у қадар зарар етмади. Аксинча, унинг зарбалари кучлироқ ва аниқроқ бўлди.

Кўпчилик Смитдан чап томондан аперкот зарбаларини кутган эди, бироқ ҳаммаси чаппасига кетди. 7-раунда келиб, унинг ўзи ўнг томондан келган аперкотни ўтказиб юборди. Рақибининг мувозанатни йўқотганини пайқаган Артур тезда олдинга ўтиб, уни икки марта полга ағанатди, шундан сўнг Каллумнинг бурчаги жангни тўхтатишга қарор қилди. Британияликнинг ҳужумларига қарамай, жанг бир томонлама ўтди дейиш мумкин. Энди чеченистонлик боксчига фақатгина битта муносиб рақиб қолди. У ҳам бўлса Дмитрий Бивол. «Ҳа, албатта, менга тўртинчи камар керак. Бу мен учун ушбу вазнда барча мақсадларимга етгганимни англатади. Бўлажак жанг катта аҳамиятга эга», деди Артур Бетербиев. Боб Арум эса чемпион Рамазон ойидан 3 ой ўтиб, Биволга қарши жангга тайёр бўлишини айтиб ўтди.

Хабиб Жўрабоев тайёрлади