Бивол? Головкин? Буларнинг ҳаммаси миш-ми? Канелонинг мураббийи ойдинлик киритди

Куни кеча Сауль Альварес (57-1-2, 39 КО) Эдди Хирннинг "Matchroom Boxing" жамоаси билан икки жанглик шартнома имзолаш арафасида тургани ҳақидаги миш-мишлар мексикаликлар жамоаси томонидан рад этилди.

"Канелонинг навбатдаги жанги учун таклифлар борлигини эълон қилишдан хурсандман. Музокаралар жараёни ҳамон давом этмоқда. Якуний қарор қабул қилинмади”, - деди Альвареснинг мураббийи Тwitter'да.

ESPN маълумотларига кўра, Альварес ва Хирн камида 85 миллион долларлик икки жангдан иборат шартнома бўйича келишувга эришдилар. Тарқалган маълумотларга кўра, биринчи жангда Сауль гўёки ярим оғир вазн тоифасига қайтади ва у ерда май ойида WBА чемпиони Дмитрий Биволга қарши баҳс олиб боради. Ушбу шартнома бўйича таклиф қилинган иккинчи жанг сентабрь ойида ўрта вазнда IBF чемпиони Геннадий Головкин билан трилогия бўлади.

Таъкидланишича, Канело энди Showtime/PBC таклифини (май ойида Жермалл Чарло билан жанг қилиш) кўриб чиқмаяпти, бироқ унинг жамоаси буни тасдиқламади.

"Айни пайтда, кеча эълон қилинган барча маълумотлар асоссиз. Шартнома имзолангандан сўнг, жамоамиз биринчи бўлиб жамоатчиликни хабардор қилади", - дея таъкидлади Рейносо.