Блогер Жейк Пол рақибини биринчи раундда нокаутга учратди

АҚШнинг Флорида штати Орландо шаҳрида ташкил этилган оқшом доирасида у ҳамюрти Андре Августга қарши рингга кўтарилди. Америкалик 26 ёшли Жейк жангни имкон қадар тезроқ якунлашга ваъда берганди ва у буни амалда уддалади. Пол биринчи раунднинг иккинчи дақиқаси ўттиз иккинчи сонияси ўтиб бораётган бир паллада рақибини ўнг томондан йўллаган апперкот зарбаси эвазига нокаутга учратди. 

Шу тариқа, Жейк Пол кетма-кет иккинчи ғалабасини нишонлади. У бундан аввалги жангида ҳакамларнинг айри қарори билан британиялик профессионал боксчи Томми Фьюрига очколар ҳисобига кўра имкониятни бой бериб қўйганди. Шу йилнинг августида эса у собиқ UFC жангчиси Нейт Диасни мағлуб этган эди.

Бугун Пол профессионал боксдаги саккизинчи ғалабасини қўлга киритди. У фаолияти давомида Бен Аскрен, Андерсон Сильва, Тайрон Вудли сингари таниқли аралаш яккакураш усталаридан устун келган. Жейк Полнинг PFL лигаси билан шартномаси бўлиб, келаси йили аралаш қоидалар бўйича ҳам дебют қилади.