Бокс рассомлари танлови: Токио Олимпиадаси чиптаси кимга насиб этди? + ФОТО

Танлов шартларига кўра, рассомлар ўзбек боксчи ва мураббийларига бағишланган суратларни чизишлари лозим эди. Ғолиб эса ажойиб совға - Токио Олимпиадаси йўлланмаси ваъда қилинганди. Бугун Миллий олимпия қўмитасида ушбу танлов якунларига бағишланган тантанали маросим ташкил этилди.

Тантанали тадбирда Ўзбекистон Миллий олимпия қўмитаси бош котиби Ойбек Касимов, Ўзбекистон бокс федерацияси раисининг биринчи ўринбосари Сакен Полатов, Ўзбекистон халқ рассоми Акмал Нур, таниқли актёр Рустам Сагдуллаев, Ўзбекистон рассомлар уюшмаси вакиллари, танлов иштирокчилари ва ОАВ ходимлари иштирок этишди. 

Танловда кўплаб суратлар, 100 га яқин иш қатнашди. Бу ўз навбатида ҳайъат аъзолари томонидан ғолибларни аниқлаб олишда катта қийинчилик туғдирди. Аммо якунда барибир узоқ баҳс-мунозаралардан сўнг махсус комиссия томонидан ғолиб аниқланди. 

Унга кўра, ҳайъат аъзолари Лутфулло Қодировни энг олий мукофот - Токио Олимпиадаси йўлланмасига лойиқ кўришди. Ғолибимиз чизган суратларининг аҳамиятли томони шундаки, Лутфулло ўз суратларини қўлда эмас, оёқлари билан чизган эди. Иккинчи ўринни Умар Ражабов эгаллаган бўлса, учинчи ўриндан Лазиза Тўлаганова жой олди. 

Бугунги финал тадбирига етиб келган барча иштирокчиларга Ўзбекистон бокс федерацияси томонидан махсус совғалар - Исроил Мадримовнинг имзоси туширилган бокс қўлқоплари тақдим этилди. 

Ўзбекистон бокс федерацияси матбуот хизмати

(1-ўрин)

(2-ўрин)

(3-ўрин)

Тадбирдан суратларни томоша қилинг: