Боксчи йигитларимиз нима учун Қозоғистондаги Жаҳон кубогига боришмади? Бокс федерацияси бунга муносабат билдирди

Мазкур мусобақада Ўзбекистоннинг фақат аёллар терма жамоаси иштирок этмоқда. Эркаклар терма жамоамиз эса баҳсларда қатнашмаяпти. 

Бу масалада Ўзбекистон бокс федерацияси бош котиби Шоҳид Тиллабоевнинг фикрлари билан қизиқдик. 

"Йигитлар кўп жанглар ўтказишди. Жароҳат ва ортиқча юкламалардан сақланиш мақсад қилинган. Ўз режамиз бўйича ишни давом эттиришга қарор қилдик. 

Бу мусобақада яхши қатнашиш учун боксчиларни яхши формага олиб кириш керак. Формага кирсак, олдинда Ливерпулдаги Жаҳон чемпионатига оз вақт қолмоқда. Кейин йигитларни яна формага олиб кириш мураббийлар учун қийинчилик туғдириши мумкин. Шу сабабли биз асосий эътиборни Ливерпулдаги жаҳон чемпионатига қаратамиз ва мураббийлар штаби тузиб чиққан режага биноан иш қиламиз", - деди Шоҳид Тиллабоев Olamsport.com сайти журналисти Азиз Тўхтамуродов билан суҳбатда. 

Эслатиб ўтамиз, World Boxing томонидан ташкил этиладиган ва Ливерпуль мезбонлик қиладиган жаҳон чемпионати 4-14 сентябрь кунлари ўтказилади.