Боксчиларимизга Президент Мурожаатномасининг мазмун-моҳияти етказилди

Президентимиз ўз Мурожаатномасида якунланган йил нақадар оғир ва масъулиятли ўтгани, аммо халқимиз ушбу синовларни биргаликда, якдил бўлиб енгиб ўтганлигини алоҳида таъкидлади.

Бугун Тошкент вилоятида жойлашган "Янгиобод" ўқув базасида ушбу мурожаатнома юзасидан давра суҳбати ташкил этилди. Унда Ўзбекистон бокс федерацияси бош котиби Муроджон Мамадалиев бошчилигидаги мутасаддилар, терма жамоамиз бош мураббийи Марат Қурбонов, терма жамоа мураббийлари ва боксчи йигитларимиз иштирок этишди. 

Давра суҳбати давомида Мурожаатномада келтириб ўтилган "Ёшларни қўллаб-қувватлаш ва аҳоли саломатлигини мустаҳкамлаш йили" Давлат дастурини амалга ошириш, жумладан, ҳар томонлама етук, замонавий билим ва ҳунарларни пухта эгаллаган азму шижоатли, ташаббускор ёшларни тарбиялаш, иқтисодиёт, давлат бошқаруви, инсон ҳуқуқ ва эркинликларини ҳамда қонун устуворлигини таъминлаш, ташқи сиёсат, Давлат бошқаруви органлари иш фаолияти самарадорлиги ва натижаларини ошириш каби соҳаларда олиб борилаётган ислоҳотларнинг моҳиятини янада чуқур тушунтириб ўтишди.

"Токио Олимпиадаси бошланишига оз вақт қолди. Муҳтарам юртбошимиз сиз спортчиларга, ҳусусан боксчиларимизга катта ишонч билдирмоқдалар. 2020 йилда пандемия шароитига қарамай, давлатимиз раҳбари томонидан спортга бўлган эътибор камаймади. Биз спорт оиласи вакиллари ушбу эътибор ва ғамхўрликка жавобан Япония мезбонлик қиладиган Олимпиадада юқори натижаларни қайд этишимиз лозим", - деди Муроджон Мамадалиев. 

Шунингдек, йиғилганлар Мурожаатномада илгари сурилагн ташаббус ва ғояларнинг аҳамияти, ижро механизмига тўхталиб ўтилди. Тадбир иштирокчилари бу борада ўзаро фикр алмашдилар. 

Ўзбекистон бокс федерацияси матбуот хизмати