Британиялик промоутер Турки Ал аш-Шайх ва Дана Уайтни судга бермоқчи

У янги Zuffa Boxing промоутерлик компанияси акциядорларини у билан тузилган шартномаларни бузганликда айбламоқда ва бой берилган фойдадан тахминан бир миллиард доллар ишлаб олмоқчи, деб ёзади The Telegraph.

Уорреннинг Queensberry компанияси 2023 йил сентябрь ойида Саудия Арабистонининг SELA компанияси билан эксклюзив шартнома тузган, у Турки Ал аш-Шайх бошчилигидаги Саудия Арабистони кўнгилочар бош бошқармаси билан боғлиқ.

Уларнинг ҳамкорлиги 2023 йил октябрь ойида Тайсон Фьюри ва Фрэнсис Нганну ўртасидаги жангни ташкил қилиш билан бошланган ва Queensberry SELA билан муҳим махфий маълумотларни баҳам кўрган. Кейинчалик Queensberry UFC ва WWE брендларига эгалик қилувчи ТКО Group компанияси билан ҳам шартнома имзолади ва у ҳам ушбу маълумотларга киришга муваффақ бўлди.

Ўтган йили SELA ва TKO Group ушбу маълумотдан фойдаланиб, Queensberry билан тузилган шартномаларни бузган ҳолда, иккинчисининг хабарисиз Zuffa Boxing компаниясини ташкил этган. Жорий йил бошидан Zuffa ўз турнирларини ўтказишни бошлади ва аллақачон жаҳон чемпиони Жей Опетая ва британиялик машҳур боксчи Конор Бенн билан шартнома имзолади.

Энди Queensberry улардан SELA ва TKO Group шартномаларни бузмаганда компания ишлаб топиши мумкин бўлган бир миллиард долларни ундириб олмоқчи. Queensberry аллақачон компанияларга судгача бўлган даъволарни юборган ва агар даъволар қондирилмаса, Лондон Олий судига мурожаат қилмоқчи.