Британиянинг «The Telegraph» нашри Ўзбекистон Президентининг соғлом турмуш тарзини тарғиб қилиш ташаббуси ҳақида ёзди

«Дунё» АА хабар беришича, мақола нашрнинг Марказий Осиё бўйича мухбири Жеймс Килнер томонидан ёзилган.

Материалда Ўзбекистон Президенти Шавкат Мирзиёевнинг аҳоли ўртасида соғлом турмуш тарзини қўллаб-қувватлаш бўйича янги ҳаракатни яратиш ташаббуси ҳақида сўз юритилган.

Муаллиф пиёда юришни рағбатлантириш, айниқса, кунига 10 минг қадам босиш ғоясини мамнуният билан қўллаб-қувватлаган. У ўзбек ошхонаси ўзининг ажойиб хусусиятлари, жумладан, бетакрор палов ва сомса билан машҳурлигини таъкидлар экан, ушбу таомлар кучли калорияли бўлгани сабабли овқатланишдан кейин, албатта, жисмоний машқлар, хусусан пиёда юриш ва кечки сайр инсон соғлиғи учун фойдадан холи эмаслигини қайд этади.

Жеймс Килнерга кўра, давлатимиз раҳбари аҳоли саломатлиги ҳақида ғамхўрлик қилиб, ушбу ғояни илгари сурди. Бу коронавирус тарқалиши пайтида жуда долзарб ва ўзбекистонликлар орасида янги фитнес-тренднинг бошланиши бўлди.

Муаллиф Президент Шавкат Мирзиёев одамларни туз, шакар ва ёғ миқдори юқори бўлган таомлар, шунингдек, хамирли овқатлар, ширинликлар ва нон маҳсулотлари истеъмолини камайтиришга чақирганини таъкидлайди. Президент аҳоли ўртасида тўғри овқатланиш ва соғлом турмуш тарзини ҳар томонлама тарғиб қилиш ва спорт марказлари сонини кўпайтириш ташаббусини илгари сурди.

«The Telegraph» - Буюк Британияда 1855 йилдан буён нашр этилаётган кундалик миллий газетадир. Босма нашр ҳар куни 318 минг нусхада чоп этилмоқда. Газета Буюк Британия ва хорижий мамлакатларда тарқатилади.