"Бу — шармандалик!" — Паулу Фонсека Трампга Тинчлик мукофоти берилгани ва ЖЧ-2026 АҚШда ўтишига қарши чиқди

Португалиялик мутахассис айниқса ФИФАнинг АҚШ президенти Дональд Трампга нисбатан муносабатини кескин қоралади.

"Трамп фақат пул ҳақида ўйлайди"

Фонсека АҚШ президентининг ташқи сиёсатини танқид қилар экан, унинг инсоний қадриятлардан кўра иқтисодий манфаатларни устун қўйишини таъкидлади:

"Америка президенти одамлар ҳақида ўйламайди, у фақат пул ҳақида бош қотиради. У заифларни ва ёрдамга муҳтожларни эътибордан четда қолдиради. Бу мен учун мутлақо қабул қилиб бўлмас ҳолат".

ЖЧ-2026 бошқа жойда ўтиши керакми?

Мураббий яқинлашиб келаётган Жаҳон чемпионатининг манзили борасида ҳам ўз эътирозларини билдирди:

"Футболни севадиган инсонлар Жаҳон чемпионати бошқа жойда ўтишини афзал кўришган бўларди. АҚШда эмас, ҳозир эмас. Футбол бунга қарши норозилик билдириш учун энг яхши йўлми-йўқми, билмайман, лекин менинг позициям шундай".

ФИФА Тинчлик мукофоти ҳақида:

Ўтган йилнинг декабрь ойида Трампга ФИФАнинг Тинчлик мукофоти топширилгани Фонсеканинг ҳақиқий ғазабини келтирган:

"Буни кўрганимда нимани ҳис қилдим? Уят! Бу жуда ачинарли ҳолат. Футбол бунга лойиқ эмас. Бу шунчаки шармандалик", — деди Фонсека "L’Équipe" нашрига берган интервьюсида.

Эслатиб ўтамиз, Паулу Фонсека бундан аввал ҳам Фаластинни қўллаб-қувватлаб ва Венесуэла атрофидаги воқеаларга нисбатан ўз сиёсий қарашларини фаол билдириб келган эди.