Бугун блиц бўйича жаҳон чемпионати бошланади

Уч кун давом этган рапид бўйича жаҳон чемпионатида ғолиб ва совриндорлар аниқланган эди. Эркаклар ўртасида россиялик 18 яшар иқтидор эгаси Володар Мурзин 10 очко билан жаҳон чемпионига айланганди. Унинг ватандошлари Александр Гришук (2675) 9,5 очко билан иккинчи ўринни эгаллаган бўлса, шунча очкога эга Ян Непомняший (2758) қўшимча кўрсаткичларга кўра кучли учликка якун ясаб берганди. Ўзбекистонлик шахматчилар орасида энг яхши натижага Жавоҳир Синдаров (2655) эришди. У 13 имкониятдан 9 очко жамғариб, қўшимча кўрсаткичларга кўра 6-ўринни эгаллади. 

Аёллар ўртасида эса Ҳампи Конеру (Ҳиндистон, 2431) жаҳон чемпиони бўлди. Жаҳон чемпионатида қатнашаётган ягона вакиламиз рапид баҳсларида шов-шувли натижа қайд этди. Афруза бир неча жаҳон чемпионларини мағлубиятга учратиб, якунда чемпиондан бор йўғи ярим очко кам тўплади. Кучли учликдан жой олган Жу Вен Жун (Хитой, 2536) ва Катерина Лагно (FIDE, 2433) билан бир хилда очко жамғариб, совринли ўринлардан четда қолгани бироз аламли бўлди. 

Бугун жаҳон чемпионатида блиц, яъни тезкор шахмат баҳслари старт олади. Бугуннинг ўзида 13 та партия ўтказилади. Эртага эса плей-офф босқичи - 1/4, 1/2 ва финал баҳслари ташкил этилади. Эркаклар ўртасидаги мусобақада Нодирбек Абдусатторов (2707), Жавоҳир Синдаров (2628), Шамсиддин Воҳидов (2593), Жаҳонгир Воҳидов (2546) ва Муҳиддин Мадаминов (2471) юртимиз спорт шарафини ҳимоя қилади. Аёллар ўртасидаги блиц баҳсларида Афруза Ҳамдамовага мухлислик қиламиз.