Бугун "Ҳумо Арена"да кардидан икки чемпионлик жанги ўрин олган Octagon 85 турнири бўлиб ўтади

Оқшомнинг асосий жанги ҳамюртимиз Шоҳасан Мирзаматов (16-4-0) ҳамда Лиганинг ярим ўрта вазн тоифасидаги қозоғистонлик чемпиони Богдан Пшебельский (7-2-0) ўртасида бўлиб ўтади. 

Турнирнинг co-main event жанги эса ўта енгил вазнда вакант бўлиб турган чемпионлик камари учун кечади ва унда 5 та ғалабали серия билан келаётган ҳамюртимиз Жамолиддин Раҳмонжонов (5-0-0) қозоғистонлик Эламан Жетписбай (6-1-1) билан тўқнаш келади.  

Асосий кард доирасидаги яна бир қизиқарли жанг ўрта вазн тоифасида ўтказилади. Унда 31 ёшли спортчимиз Мансур Отажонов (4-3-0) қозоғистонлик 26 яшар Арнур Кабдолдаев (4-1-1)га қарши октагонга чиқади.  

Octagon 85 турнирида медиа-жангчи Одилхон Камолов қозоғистонлик Кеменгер Ауезов билан ҳисоб-китоб қилади. Одилхон фаолияти давомида 14 та жанг ўтказиб, 9 ғалаба ва 5 мағлубият қайд этган. Ауезов ҳисобида эса 1 тагина ғалаба бор.

Шунингдек, бугунги турнир кардида Оғабек "Сатурн" Абдумўминов, Жасурбек "Тайсон" Жўраев, Самандар "Танк" Реймбаев сингари медиа жангчилар ҳам октагонга кўтарилади. Турнир соат 17:00да бошланади. Чипталар 50 мингдан 700 минг сўмгача сотилмоқда.