Бугун икки теннис маликамиз Уимблдон саралашидаги иштирокини бошлайди

Мусобақанинг асосий тўр баҳслари 29 июнь куни бошланиб, 12 июлга қадар давом этади. Биз учун аҳамиятлиси, аёллар ўртасидаги саралаш баҳсларида мамлакатимизнинг икки теннис маликаси ҳам ўз омадини синаб кўради. Бугун улар саралашнинг илк босқичида кортга чиқишади. 

Ўзбекистоннинг иккинчи ракеткаси Мария Тимофеева қуръа натижасига кўра саралашнинг 1/4 финалида америкалик Уитни Осигвега қарши кортга чиқади. Учрашув бизнинг вақт билан соат 19:30да бошланади. Мария айни пайтда WTA рейтингида 92, Уитни 183-ўринни эгаллаб турибди. Бу теннисчиларнинг ўзаро илк учрашуви бўлади.

Мамлакатимизнинг учинчи ракеткаси Полина Кудерметованинг 1/4 финалдаги рақибаси франциялик Жессика Понше бўлади. Полина айни пайтда дунёнинг 116, Понше эса 190-ракеткаси бўлиб турибди. Ушбу баҳс бизнинг вақт билан соат 18:00да старт олади. Икки теннисчи шу йилнинг 8 апрель куни Мадрид турнирининг 1/8 финалида ўзаро тўқнаш келишган ва унда Кудерметова 6/1, 6/2 ҳисобида зафар қучганди.