Бугун Нодирбек Абдусатторов Шуша турнирида 4 та учрашув ўтказади + ФОТО

Ўз тарихида 10-маротаба ташкил этилаётган ушбу нуфузли турнирда жами 8 нафар гроссмейстер, улар қаторида ҳамюртимиз Нодирбек Абдусатторов ҳам иштирок этяпти. Мамлакатимизнинг биринчи рақамли шахматчиси мазкур мусобақанинг 2022 йилги чемпиони ҳисобланади. 

Хабар берганимиздек, Нодирбек кеча ўтказилган 3 та тур учрашувида 3 хил натижа қайд этди. Ғалаба билан бошлаб, ўртада дуранг ва якунда мағлубият билан тугатди. Бугунги учрашувлар олдидан у қўшимча кўрсаткичларга кўра 5-ўринни эгаллаб турибди. Кеча 3-турда айнан Абдусатторовни таслим этган Ян Непомняший мусобақа жадвалида якка пешқадамлик қиляпти. Кеча у Нодирбекнинг қўпол хатосидан унумли фойдаланиб кетганди. 

Бугун рапид йўналишида қолган 4 та тур учрашувлари ўтказилади. Абдусатторов бугунги иштирокини қора доналарда Владислав Артемьевга қарши баҳс билан бошлайди. Кейин оқ доналарда озарбайжонлик Шахрияр Мамедьяров билан ҳисоб-китоб қилади. Олтинчи турда яна оқ доналарда ўйнайди, бу сафарги рақиб - Риччард Раппорт! Рапиддаги иштирокини қора доналарда мезбонлар вакили Рауф Мамедовга қарши учрашув билан якунлайди.   

Маълумот учун, норвегиялик Магнус Карлсен турнирнинг 4 карра ғолиби ҳисобланади. Шахрияр Мамедъяров икки бор чемпионликка эришган бўлса, Фабиано Каруана (АҚШ), Нодирбек Абдусатторов (Ўзбекистон) ва Видит Сантош (Ҳиндистон) бир маротабадан бош совринга эга чиққан.