Бугун Нодирбек Абдусатторов Шуша турниридаги иштирокини бошлайди

Ўз тарихида 10-маротаба ташкил этилаётган ушбу нуфузли турнирда жами 8 нафар гроссмейстер, улар қаторида ҳамюртимиз Нодирбек Абдусатторов ҳам иштирок этади. Мамлакатимизнинг биринчи рақамли шахматчиси мазкур мусобақанинг 2022 йилги чемпиони ҳисобланади. 

Ўнинчи юбилей турнир иштирокчилари: Шахрияр Мамедъяров, Рауф Мамедов, Айдин Сулейманли (барчаси Озарбайжон), Нодирбек Абдусатторов (Ўзбекистон), Владислав Артемьев, Ян Непомнящий (иккиси ҳам ФИДЕ), Ричард Раппорт (Венгрия), Аравинд Читамбарам (Ҳиндистон).

Қатнашчилар бугун ва эртага рапид, 29 сентябрь куни эса блиц йўналишида ўзаро баҳсларга киришадилар. Вугар Гашимов халқаро хотира турнирининг амалдаги чемпиони ҳиндистонлик Видит Сантош мусобақага кела олмади. Унинг ўрнини бошқа бир ҳинд гроссмейстери Аравинд Читамбарам эгаллади.

Маълумот учун, норвегиялик Магнус Карлсен турнирнинг 4 карра ғолиби ҳисобланади. Шахрияр Мамедъяров икки бор чемпионликка эришган бўлса, Фабиано Каруана (АҚШ), Нодирбек Абдусатторов (Ўзбекистон) ва Видит Сантош (Ҳиндистон) бир маротабадан бош совринга эга чиққан.