Бугун Шерзод Ҳусанов Польшада жанг ўтказади, у тарозидан ўтиб олди

Биз учун аҳамиятлиси, Babilon Promotion промоутерлик компанияси томонидан ташкил этилаётган ушбу бокс оқшомининг марказий жангида ҳамюртимиз Шерзод Ҳусанов рингга кўтарилади. Тажрибали боксчимиз польшалик Павел Степинга қарши жанг ўтказади. Кеча тунда ҳар икки боксчи тарозидан ўтиш ҳамда face to face маросимларидан муваффақиятли тарзда ўтиб олди. Боксчилар белгиланган вазн меъёрини бажаришди. 

Таққослаш учун, 34 ёшли мезбон боксчи проф фаолияти давомида 21 та жанг ўтказиб, 19 ғалаба, 1 мағлубият ва 1 та дуранг қайд этган. Ўн иккита жангда рақибларини муддатидан аввал таслим этган. Фаолиятидаги 20 та жангини ўз ватанидаги бокс оқшомларида ўтказган. Фақат бир маротаба Англиянинг Бирмингем шаҳрида ташкил этилган бокс кечасида британиялик таниқли чарм қўлқоп устаси Жошуа Буатсига қарши рингга чиқиб, мағлубиятга учраган. 

Шу йил январь ойида 44 ёшини қаршилаган, 2007 йилдан бери проф рингда жанг ўтказиб келаётган Шерзод Ҳусановнинг ҳисобида 28 та жанг бор. У 24 ғалаба (12 нокаут), 3 мағлубият ва 1 дуранг натижа қайд этган. Шу йил апрель ва май ойларида Андижонда ўтган проф бокс кечаларида мос равишда Одилжон Жўрабоев ва Ғиёсбек Мамажоновни мағлубиятга учратган эди.