Бугун Tata Steel Chess турнирида сўнгги тур ўтказилади. Нодирбекларда имконият қандай?

Бугун сўнгги 13-турда "Мастерс" гуруҳида 3-ўринни эгаллаб турган Нодирбек Абдусатторов оқ доналарда ҳиндистонлик Пентала Ҳарикришнага қарши баҳс олиб боради. Нодирбекда турнир чемпиони бўлиш имконияти деярли қолмаган. Лекин умуман йўқ эмас. 

Ундан бир очко кўп жамғарган икки ҳинд гроссмейстерлари бугун 13-турда ютқазган тақдирларида Нодирбекда очколарни тенглаштириб олиш имконияти юзага келади. Фақат бунинг учун унинг ўзи ҳам рақибини мағлуб этиши керак бўлади. Бугунги партия олдидан амалдаги жаҳон чемпиони Гукеш Доммараджу 8,5 очко билан қўшимча кўрсаткичларга кўра пешқадам бўлиб турибди. Агар кеча Абдусатторов ҳиндистонлик Аржун Эргаисига ютқазмаганида, бугун чемпионлик учун имкониятни анча юқори бўлар эди. 

"Челленжер" гуруҳида қатнашаётган Нодирбек Якуббоев (2659) кетма-кет иккита ғалабасига қарамай, турнирда совринли учликдан жой ололмайди. У бугун 13-турда қора доналарда хитойлик аёл шахматчи Лу Миаойи билан тўқнаш келади. Якуббоев 7 очко билан 6-ўринни эгаллаб турибди. Бешинчи поғонадаги германиялик Фредерик Сван ҳисобида ҳам 7 очко бор. Чехиялик Ван Нгуен 8,5 очко билан "Челленжер" гуруҳида қўшимча кўрсаткичларга кўра карвонбошилик қиляпти. Озарбайжонлик Айдин Сулейманли ва нидерландиялик Эрвин Л`ами ҳисобида ҳам 8,5 очкодан бор, улар кучли учликни якунлаб беришган.