Бугун Тошкентда шахмат бўйича Prezident Kubogi турнири бошланади

Тўққиз кун давомида дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун ўзаро баҳс олиб боришади. Иштирокчилар FIDE рейтингидаги ўринларига қараб А ва В гуруҳларида дона суришади.  

Юртимиз шарафини А гуруҳи баҳсларида Нодирбек Абдусатторов, Жавоҳир Синдаров, Шамсиддин Воҳидов, Нодирбек Якуббоев сингари таниқли гроссмейстерларимиз ҳамда истеъдодли ёш шахматчиларимиз ҳимоя қилади. Абдусатторов халқаро турнирнинг биринчи рақамли иштирокчиси сифатида сараланган. Эронлик Парҳам Мақсудлу иккинчи, унинг ҳамюрти Амин Табатабайи учинчи рақам остида таснифланган.   

Барча тўққиз учрашувини биринчи тахтада ўтказадиган Нодирбек Абдусатторов (2777) бугун соат 14:00да старт оладиган 1-тур баҳсида қора доналарда ҳиндистонлик Самбит Панда (2380) билан ҳисоб китоб қилади.  Жавоҳир Синдаров (2682) FIDE байроғи остида ҳаракат қиладиган Екатерина Голцева, Шамсиддин Воҳидов (2681) эса ҳиндистонлик Этан Ваз (2370)га қарши дона суради.