"Бунёдкор" ва "Локомотив"нинг муштлашган футболчилари дисквалификация қилиниб, клублар жаримага тортилди

Жорий йилнинг 10 апрель санасида Лига қошидаги Тартиб-интизом қўмитасининг навбатдаги йиғилиши бўлиб ўтди. Унда мазкур санагача бўлган вақт оралиғида Ўзбекистон Суперлигаси ҳамда U-21 чемпионати учрашувларида иштирокчилар томонидан йўл қўйилган қоидабузарликлар юзасидан қарор чиқарилди.

Йиғилишда кўриб чиқилган асосий мавзу — Суперлига 5-тури доирасида бўлиб ўтган “Бунёдкор” – “Локомотив” учрашуви якунида юзага келган вазият қўмита аъзолари томоинидан атрофлича ўрганилди. Маълумот учун, мазкур баҳс якунига етгач, иккала жамоа вакиллари иштирокида зиддиятли вазият юзага келган ва жамоатчилик муҳокамасига сабаб бўлганди. Вазият иштирокчилари Лига сўровига кўра ЎФА футбол фаолиятини назорат қилиш бўйича махсус инспекциясига чақиртирилган ва махсус инспекция томонидан юқоридаги вазият атрофлича ўрганилди. Ўз навбатида, инспекция ушбу вазият хулосасини Лига қошидаги Тартиб-интизом қўмитасига кўриб чиқиш учун тақдим этган.

Лига қошидаги Тартиб-интизом қўмитаси юқорида тақдим этилган Инспекция хулосаси, учрашув комиссари билдиргиси, вазият видеоёзуви, бошқа гувоҳлар далилларини атрофлича ўрганди.

Унга кўра мазкур учрашувдан сўнг “Бунёдкор” селекционер мураббийи — Бек Абдуллаев ва “Локомотив” жамоаси футболчиси — Абдуллоҳ Йўлдошев ўзаро тортишиши оқибатида муштлашув келиб чиққани, вазиятга “Бунёдкор” футбол клуби футболчиси — Наримонжон Аҳмаджонов ҳам аралашиши оқибатида Бек Абдуллаев ва Абдуллоҳ Йўлдошев кичик тан жароҳати олгани, ЎФА футбол фаолиятини назорат қилиш бўйича махсус инспекциясининг ўрганиш хулосасига кўра, учрашувнинг 62-дақиқасида “Локомотив” жамоаси футболчиси Абдуллоҳ Йўлдошев “Бунёдкор” футбол клуби футболчиси Наримонжон Аҳмаджоновга қўполлик ишлатганидан сўнг, учрашув ҳаками томонидан унга сариқ карточка кўрсатилгани, кейинчалик мазкур футболчилар ўртасида ўзаро келишмочилик келиб чиққани, учрашувдан сўнг муштлашув содир бўлгани, бу вазиятга Миллий гвардия ходимлари аралашиб, уларни ички ишлар органлари таянч пунктига олиб боргани, у ерда бир-бирларига даъвоси йўқлиги билдирилгандан сўнг, футболчилар ва “Бунёдкор” футбол клуби селекционер мураббийи қўйиб юборилгани каби ҳолатлар аниқланди.

Юқоридаги ҳолатларни инобатга олган ҳолда қўмита қуйидагича қарорга келди:

Ўзбекистон Профессионал футбол лигаси Тартиб-интизом кодексининг 81-моддасига асосан “Бунёдкор” футбол клубига жарима интизомий жазо чораси қўлланилди.

Ўзбекистон Профессионал футбол лигаси Тартиб-интизом кодексининг 81-моддасига асосан “Локомотив” футбол клубига жарима интизомий жазо чораси қўлланилди.

Ўзбекистон Профессионал футбол лигаси Тартиб-интизом кодексининг 62-моддасига асосан “Бунёдкор” футбол клуби селекционер мураббийи — Бек Абдуллаевга нисбатан жарима интизомий жазо чораси қўлланилди.

Ўзбекистон Профессионал футбол лигаси Тартиб-интизом кодексининг 65-моддасига асосан “Бунёдкор” футбол клуби футболчиси — Наримонжон Аҳмаджоновга нисбатан 3 та ўйинга четлаштириш (дисквалификация) интизомий жазо чораси қўлланилди.

Ўзбекистон Профессионал футбол лигаси Тартиб-интизом кодексининг 65-моддасига асосан “Локомотив” футбол клуби футболчиси — Абдуллоҳ Йўлдошевга нисбатан 3 та ўйинга четлаштириш (дисквалификация) интизомий жазо чораси қўлланилди.