"Буюк Ипак йўли-2024". Баҳодир Жалолов - Камшибек Кункабаев жангини кўрмаймиз

Анъанавий тарзда ўтказиб келинаётган "Буюк Ипак йўли" мусобақасида ўнга яқин давлат боксчилари қаторида Ўзбекистон терма жамоаси ҳам тўлиқ таркибда медаллар учун рингга чиқмоқда. Улар орасида жаҳон ва Олимпиада чемпиони Баҳодир Жалоловнинг ҳам борлиги ҳақида хабар берган эдик. 

Бугун чарм қўлқоп устамиз турнирдаги илк жангини эронлик Рузбеҳ Сафарига қарши ўтказди. Уч раунд тўлиқ давом этган жанг якунида Жалолов ҳакамларнинг якдил қарори билан ғалаба (5:0) қозонди ва 1/2 финалга йўл олди. 

Афсуски, ярим финалда Жалолов - Кункабаев классик тўқнашувни кўрмаймиз. Боиси, Камшибек +92 вазн тоифаси доирасидаги 1/4 финал жангида россиялик Рамазан Карнукаевга ҳакамларнинг айри қарори билан имкониятни бой бериб қўйди. Жалолов ва Кункабаев сўнгги бор ўтган йили Осиё ўйинларининг финалида ўзаро тўқнаш келишган ва ўшанда чарм Big Uzbek 5:0 ҳисобида зафар қучганди.