Царукян шу ҳафтадаёқ жанг ўтказади, рақиб Махачевнинг жамоадоши + ПОСТЕР

Царукян 2 май куни БААнинг Дубай шаҳрида ташкил этиладиган грепплинг бўйича Karate Combat 54 турнирида жанг қилади. Унинг рақиби ватандоши Маккашарип Зайнуков бўлади. Зайнуков Ислам Махачевнинг жамоадоши ҳисобланади. Ушбу жанг 80 килограмм вазн тоифасида ўтказилади, деб хабар бермоқда таниқли спорт шарҳловчиси Ариэль Хельвани.

Шунингдек, ушбу турнирда таниқли аралаш яккакураш усталаридан Муҳаммад Мокаев, Сэм Алви ва Тайрон Спонг ҳам иштирок этади. Сэм Алви ва Тайрон Спонг ўртасидаги тўқнашув ушбу оқшомнинг асосий жанги бўлади. 

Маълумот учун, Маккашарип Зайнуков профессионал йўналишда 20 та жанг ўтказиб, 16 ғалаба ва 4 та мағлубият қайд этган. Айни пайтда у 5 та ғалабали серияли билан келмоқда. Сўнгги жангини ўтган йилнинг октябрь ойида PFL турнирида ўтказиб, ҳакамларнинг якдил қарори билан Дедрик Сандерсни мағлубиятга учратган эди.