Charleston Open. Дарья Касаткина финал остонасида Жаберга ютқазди

Илк 1/2 финал учрашувида дунёнинг саккизинчи ракеткаси, россиялик Дарья Касаткина рейтингда ўзидан уч поғона юқорида бораётган тунислик Онс Жаберга қарши кортга чиқди ва 5/7, 5/7 ҳисобларида имкониятни бой берди.

Бир соату 48 дақиқа давом этган баҳсда Жабер 5 та эйс, 4 та қўшхато ва 7 та брейк қайд этди. Касаткина эса биронта эйс зарбани амалга ошира олмади. Теннисчиларнинг ўзаро учрашувларидаги ҳисоб Онс фойдасига 5:2 кўринишига келди. 

Эътиборлиси, биринчи сет 4/1 ҳисобида Дарья фойдасига ҳал бўлаётган бир пайтда ёмғир ёғиб кетди ва натижада учрашув бир неча соатга тўхтатилди. Бу тўхталиш Жабер фойдасига ишлади. 

Тунислик теннисчининг Credit One Charleston Open турнири финалидаги рақиби америкалик Жессика Пегула ҳамда швейцариялик Белинда Бенчич ўртасидаги учрашувдан сўнг маълум бўлади. Ушбу баҳс ҳам ёмғир сабаб тўхтатилди. Ҳисоб 7/5, 6/6 (2/4), Бенчич фойдасига бўлиб турибди.