Чел Соннен: "Ўн ёшли ўғлим Дю Плессига Чимаев муаммосини ҳал қилишда ёрдам бериши мумкин"

Соннен Дрикуснинг мураббийи берган интервьюсини тинглаб, жанубий африкалик жангчининг жамоаси ҳал қилиниши керак бўлган муаммонинг моҳиятини тўлиқ тушунмаяпти, деган хулосага келди.

"Дрикус ва унинг мураббийлар штаби Чимаев муаммосини ҳал қилиш у ёқда турсин, ҳатто йўл қўйилган хато ва камчиликларнинг моҳиятини ҳам тушунмаяпти. Бу мени бироз ҳавотирга солмоқда, чунки аслида гап битта техника ҳақида кетмоқда - рақибнинг икки оёққа ташланиб, ушлаб олишидан ҳимояланиш. Техника нуқтаи назаридан, бу ўтишни тўхтатиш жуда осон. Ҳа, бу жуда кўп куч ва энергияни талаб қилади, лекин техниканинг ўзи оддий. Уни ўзлаштириш учун жаҳон ёки Олимпиада чемпиони бўлиш керак эмас. Ўғлим ўн ёшда ва у буни амалга ошира олади. Агар бу ёрдам берса, мен уни тақдим этишим мумкин" - деди Соннен ўзининг YouTube каналида.

Аввалроқ, Дю Плессининг мураббийи Морне Виссер келаси йил бошида октагонга қайтиши, машғулотларда эса кураш техникасидаги бўшлиқларни тўлдира олишига ишонишини айтганди.