Чироқчида белбоғли кураш бўйича Ўзбекистон кубоги ўтказилмоқда + ФОТО

Ўзбекистон Республикаси жисмоний тарбия ва спорт вазирлиги ҳамда Ўзбекистон белбоғли кураш федерациясининг йиллик тақвим-режасидаги мазкур мусобақада Қорақалпоғистон Республикаси, Тошкент шаҳри ва барча вилоятлардан 300 нафарга яқин ёш полвонлар белбоғли курашнинг классик ва эркин йўналишида ўз вазн тоифаларига кўра ғолиблик учун кураш тушишмоқда.  

Алоҳида таъкидлаш жоиз, Қашқадарё вилоят жисмоний тарбия ва спорт бошқармаси, вилоят белбоғли кураш федерацияси, Чироқчи туман ҳокимлиги, туман жисмоний тарбия ва спорт бўлими ҳамда туман 1-сонли болалар-ўсмирлар спорт мактаби томонидан мазкур мусобақанинг кўтаринки руҳда ўтиши учун юқори даражада тайёргарлик кўрилган.

Бугун старт берилган Ўзбекистон кубоги беллашувларида дастлаб мусобоқанинг тантанали очилиш маросими ташкил этилди. Очилиш маросимида сўз олган Ўзбекистон белбоғли кураш федерацияси раиси Равшан Дастиров, Қашқадарё вилоят жисмоний тарбия ва спорт бошқармаси бошлиғи Комил Холматов, вилоят белбоғли кураш федерацияси раиси Фарҳод Жумановлар  мамлакатимизда жисмоний тарбия ва спортга, хусусан, миллий спорт турларимизга қаратилаётган юксак эътибор хусусида таъкидлаб, мусобақа иштирокчиларига омад тилашди.

Шундан сўнг режага мувофиқ, белбоғли курашнинг классик йўналишида ўғил болалар ўртасида 11 та вазн тоифасида беллашувлар бошланди.

Беллашувлар 15 мартгача давом этади.  

Илҳом РАҲМОНОВ тайёрлади