Дана Уайт барча фирибгарларни қамоқхона кутаётганини айтди

Дана барча фирибгарлар ва уларга алоқадор жангчиларни қамоқ кутмоқда, деб таҳдид қилди.

"Сўзма-сўз айтганда, биз биринчи бўлиб ФҚБни чақиртирдик. Бугун мен ФҚБ билан икки марта гаплашдим. Бугун эрталаб офисимиз ФҚБ агентлари билан тўла эди", - деди Уайт TMZ’га берган интервьюсида. - Аниқ айтаманки, агар уриниб кўрсангиз, биз сизнинг ашаддий душманингизга айланамиз. Биз зудлик билан ФҚБ ёки бошқа биров билан олдингизга етиб борамиз. Қамоққа тушишингиз учун қўлимиздан келган ҳамма ишни қиламиз.

Уайт, шунингдек, ФҚБ ҳали ҳам 2022 йилда Даррик Миннер ва унинг мураббийи Жеймс Краузе билан боғлиқ фирибгарлик воқеасини ўрганаётганини, янги фактлар жорий терговга киритилишини тасдиқлади. Аммо кўплаб жанглар шубҳа остига олингани ҳақидаги хабарларни рад этди.

"Одамлар юзлаб жанглар терговга тушгани ҳақида гапиришмоқда, аммо бу сафсата, - деди Уайт. - Бизда ставкаларни кузатиб борадиган компания бор. Улар ўз ишининг энг яхшилари. Юзлаб жанглар бўйича ҳеч қандай тергов йўқ. Буларнинг барчаси сафсата".

Уайт матбуот ва ижтимоий тармоқларда бошқа UFC жангчиларига ҳам жангларни бекор қилиш бўйича бундай таклифлар бўлгани ҳақидаги маълумотларга яхши муносабат билдирмади.

"Ростданми? Нега бизга айтишмади? Ёки энг муҳими, ҳуқуқ-тартибот идораларига улар билан боғланишгани ҳақида? Ҳозир айтинг-чи, сиз билан нима алоқада бўлишди? Жангчилар ҳозир улар билан боғланганликларини айтишаётгани жуда ғалати. Энди улар билан ФҚБ агентлари боғланади", деб таҳдид қилган Уайт.