Даниэль Кормье: Хабиб бу йил жанг қила олмаса керак

Корьме енгил вазнда UFC чемпионининг бугунги қийин вазиятдан чиқиб кетишини осон кечмаслиги, отасининг ўлими яқин режаларига жиддий таъсир ўтказишини урғулади. 

"Абдулманап Нурмагомедовнинг вафоти жуда ҳам қайғули бўлди. Мен Хабиб билан 1 июль (катта Нурмагомедов 3 июлда вафот этганди) куни гаплашгандим. Суҳбатимиз кўп мавзуларни қамраб олганди. Отаси оғир аҳволда ётганда ўзини машғулот билан чалғитишга уринди. 

У яна машғулот лагерига қайтиши мумкин, лекин яқин орада жанг ўтказа олмаса керак. Очиғи, у билан энди нима бўлади, буни билмайман. Отаси унинг фаолиятида катта рол ўйнарди. Кеча унга қўнғироқ қилиб, кайфиятини кўтаришга ҳаракат қилдим. Лекин ўзидан ўтаётганини фақат унинг ўзи билади. Бу ростан ҳам жуда катта йўқотиш", - деди Кормье.