Даниил Ейбог: "Бундан ҳам оғирроғи фақат оёғимнинг синиши эди"

Спортчимиз 16 февраль куни 500 м масофага кечган пойга саралашида қатнашиб, йиқилганига қарамай, ташкилотчилар томонидан кейинги босқичга йўлланма ажратилганди.

"Фаолиятимдаги энг даҳшатли йиқилишлардан бирини бошдан кечирдим, десам муболаға бўлмайди (бундан ҳам оғири фақат мусобақада оёғим сингани эди). Коньки пичоғи юзимдан саноқли сантиметрлар масофада ўтиб кетди. Аммо энг қўрқинчлиси бу ҳам эмас, балки ўша сонияда ўз ожизлигингни англаш эди — сенга томон тўлиқ тезликда икки спортчи конькилари олдинга қараган ҳолда учиб келаётган пайт.

Бу Олимпия ўйинлари эканини унутмаслик керак. Бу ерда мақсадлар жуда юқори, хатар эса максимал даражада, чунки Олимпия медали шунга арзийди. Шорт-трекнинг бутун моҳияти ва томошабоплиги ҳам шунда — уни айнан шунинг учун яхши кўришади.

Менга қисман омад кулиб боқди: нисбатан енгил жароҳатлар билан қутулдим. Демак, нима бўлишидан қатъий назар, 18 февраль куни медаллар учун курашни давом эттираман", дейди Ейбог.

У бугун мазкур дастурдаги иштирокини давом эттиради.