Дастин Порье кечаги нокаутли мағлубиятига илк бор изоҳ берди

Енгил вазн тоифаси рейтингида иккинчи ўринни эгаллаб турган америкалик даъвогарлар жангида ҳамюрти Жастин Гэтжига нокаут эвазига имкониятни бой бериб қўйганди. Ўзаро жангларда мувозанатни тиклай олган Жастин вакант бўлиб турган BMF камарини ҳам қўлга киритди. Айнан у Ислам Махачевнинг чемпионлик камари учун расмий даъвогарга айланди. 

"Мен бу ҳолатдан ўтиб бўлганман. Эркак киши сифатида мағлубиятни ҳам тан ола билиш керак. Биз жаноза маросимига йиғилмадик. Мен аллақачон ғалаба қозониб бўлганман. Мен бу ҳаётда зафар қучганман. Энди бевосита жангнинг ўзига келсак, мен биринчи раунддан кейин ғалаба қозониб бўлдим деб ўйлай бошладим. Лекин олдинда яна тўртта раунд бор эди. Биринчи раундда қилган ишимни қолган беш дақиқаликларда ҳам амалга оширишимга ишонардим. Балки, хатога йўл қўйгандирман", - деди Порье.

Шунингдек, "Бриллиант" Гэтжи билан трилогияни якунлаб қўйиши ҳақида берилган саволга ҳам жавоб берди.  

"Кўрамиз. Ҳозир ўзаро жангимизда ҳисоб 1-1. Биз бир маротабадан бир-биримизни нокаутга учратдик. Жараённи кузатиб борамиз". 

Матбуот анжуманидан кейин Дастин Порье ижтимоий тармоқдаги саҳифаси орқали Жастин Гэтжига мурожаат қилди.

"Ақлбовар қилмас даража, Жастин! Ажойиб ижро!", - дея хабар қолдирган Порье.