26 дек 14:53
Янгиликлар

Бокс/ММА

Деонтей Уайлдер: "Шубҳасиз, у билан жанг қиламан"

Супероғир вазн тоифасида собиқ WBC чемпиони, америкалик 39 ёшли Деонтей Уайлдер 2026 йил учун режалари билан ўртоқлашди.

У IBF, WBA, WBO ва IBO йўналишларида собиқ жаҳон чемпиони, британиялик 36 ёшли Энтони Жошуа билан жанг ўтказишга тайёрлигини маълум қилди.

"Деярли аниқ, Жошуа билан жанг қиламан. Ҳа, шубҳасиз! Биз жангчилармиз, Энтони ҳамон фаол. Ўртамиздаги жанг - одамлар ҳали ҳам кўришни истайдиган энг муҳим жанглардан бири. Юқорида айтиб ўтганимдек, иккаламиз ҳам ҳали ҳануз шу бизнесдамиз. Имконият бор экан, биз рингда ўзаро учрашишимиз керак", - дея Уайлдернинг сўзларини келтиради MMA Mania портали.

Эслатиб ўтамиз, Деонтей Уайлдер профессионал боксчи сифатида 2008 йилнинг ноябридан бери рингга кўтарилиб келмоқда. Унинг рекордида 44 та ғалаба, тўртта мағлубият ва битта дуранг бор.