Девин Хейнининг WBC камарига мажбурий даъвогар маълум

Оқшомнинг марказий жанги енгил вазн (61,2 кг) тоифасида ўтказилиб, унда америкалик истеъдод Фрэнк Мартин (17-0, 12 KO) асли келиб чиқиши арманистонлик, ҳозирда Германия шарафини ҳимоя қилаётган Артём Арутюнян (12-0, 7 KO)га қарши рингга кўтарилди.

Ҳар икки боксчи ҳам кечаги жангга қадар мағлубият ва муроса нималигини билмай келаётганди. Ғолиб боксчи WBC камарига мажбурий даъвогарга айланиши боис, жангга бўлган қизиқиш жуда юқори эди. 

Ўн икки раунд тўлиқ давом этган даъвогарлар жанги ҳакамлар қарорига кўра аниқланди. Унда Мартин ҳакамларнинг якдил қарори билан 115-112, 115-112, 114-113 ҳисобларида ғалаба қозонди.

Маълумот учун, 28 ёшли Фрэнк Мартин профессионал боксда 2017 йилда дебют қилган. Барча  жангларини АҚШ ҳудудида ўтказган. Ушбу вазнда америкалик Девин Хейни (30-0, 15 KO) WBC чемпиони бўлиб турибди. У шунингдек, WBA, IBF ва WBO камарлари соҳиби ҳам ҳисобланади.