Дилшодбек Рўзметов: "Руфат Рисқиев кубоги" учун ҳам курашаман"

-81 кг вазн тоифасида жаҳон чемпионати финалчиси, Ўзбекистон чемпионатида "Динамо спорт жамияти" шарафини ҳимоя қилаётган Дилшодбек Рўзметов илк жангини бухоролик Абдукарим Фармоновни ўтказиб ғалаба қозонди ва кейинги босқичга йўл олди.

Жангдан сўнг спортчимиз ўз фикрларини билдириб ўтди.

"Спортчида биринчи навбатда ишонч бўлиши керак. Жаҳон чемпионати совриндори бўлсамда, мамлакат биринчилигида ҳам қатнашиб тажрибамни оширишим зарур. Ўз вазнимда Козимбек Мардоновни асосий рақиб деб ҳисоблайман. "Руфат Рисқиев кубоги" учун ҳам кураш олиб бораман.  Миразизбек Мирзаҳалилов, Абдумалик Ҳалаковни кубок учун фаворитлар сафида пешқадам деб биламан. Абдумаликнинг техникаси жуда кучли, рингда енгил ва хотиржам ҳаракат қилади. Менда эса жангда ҳаяжонланиб ўзимни йўқотиб қўйиш ҳолатлари бўлади. Шунда мураббийларимнинг кўрсатмалари бор диққат-эътиборимни рақибимга қаратишга ёрдам беради"-деди Дилшодбек Рўзметов.

Эслатиб ўтамиз, 2019 йилдан бошлаб Ўзбекистон бокс федерацияси ташаббуси билан катталар ўртасидаги мамлакат чемпионатининг энг яхши боксчисига "Руфат Рисқиев кубоги" топширилади. 

Сарвиноз Рахмонқулова