Dubai Duty Free Tennis Championships. Соболенкода аламли мағлубият

Мусобақанинг умумий мукофот жамғармаси 2 миллион 788 минг 468 долларни ташкил этади. Ғолиб 454 минг 500 доллар мукофот пули ҳамда 900 рейтинг очкосини қўлга киритади. Чемпионлик учун асосий даъвогарлардан бири Арина Соболенко 1/4 финал учрашувида аламли мағлубиятни қабул қилиб олди. 

Дунёнинг иккинчи рақамли теннис маликаси 1 соату 57 дақиқа давом этган баҳсда WTA рейтингида 30-поғонада бораётган чехиялик Барбора Крейчиковага 6/0, 6/7(2), 1/6 ҳисобида имкониятни бой берди. Барбора илк бор номдор рақибасини таслим эта олди - 1:2. 

Статистикага эътибор қаратадиган бўлсак, ҳар икки теннисчи ҳам 5 тадан эйс зарбасини ижро этган. Қўшхатолар Крейчиковада кўпроқ бўлди 7-2 кўринишда. Биринчи сетни 6/0 ҳисобида ўз фойдасига ҳал қилган Арина иккинчи сетда ҳам 3/1 ҳисоби билан олдинга чиқиб олганди. Аммо Крейчикова камбекни амалга ошириб, Арина Соболенконинг 13 та учрашувдан иборат ғалабали сериясига чек қўйди.