Дунёнинг собиқ иккинчи ракеткаси фаолиятини якунлади

“Мен бугун ҳаётимдаги энг муҳим ва шу билан бирга оғир қарорлардан бирини қабул қилдим. Ўн уч йил давом этган профессионал теннисдаги фаолиятим якунланди. Бу қарорга келиш мен учун осон бўлмади. Лекин бу ҳаёт, бу тақдир. 

Фаолиятим мобайнида 20та соврин қўлга киритдим. Якуний турнирда ғолиб бўлдим, Уимблдон турнири финалида ўйнадим. Энди аввалгидек юқори савияда машғулот ўтказа олмайман, турнирларда иштирок этолмайман. Инсон организми ҳамиша бирдек бўлиб қолмайди”, - деди Радваньска.

Маълумот учун, Агнешка Радванска профессионал теннисчилик фаолиятини 2005 йилда бошлаган. Ўтган давр мобайнида у 20та турнирнинг яккалик, 2та мусобақанинг жуфтлик баҳсларида чемпион бўлди. Турнирлардаги иштирокидан 27 млн 683 807 доллар ишлаб топди. Агнешка 594та учрашувда ғалабага эришди, 269 баҳсда мағлубият аламини тотиб кўрди. Рейтингдаги энг яхши натижаси - 2-ўрин бўлди.