Душанбе Осиё чемпионатига мезбонлик қилади, Конфедерация президенти манзилга етиб келди

Мазкур қитъа чемпионатида йигирмадан зиёд давлатдан сара курашчиларнинг иштироки кутилмоқда. Бугунгача Душанбега Хитой Тайпейи, Қувайт, Таиланд, Индонезия, Ҳиндистон, Мўғилистон, Эрон каби мамлакатларнинг кураш делагациялари етиб келган.

Чемпионат доирасида 18 март куни Осиё-Океания Кураш Конфедерациясининг навбатдаги Конгресси бўлиб ўтади. Унда қитъамизда Курашни янада ривожлантириш, Осиё-Океания Кураш Конфедерацияси Уставининг янги таҳририни қабул қилиш, янги федерацияларни аъзоликка қабул қилиш ҳамда бошқа ташкилий масалалар кўриб чиқилади.

Бугун мазкур муҳим тадбирларда иштирок этиш учун Осиё-Океания Кураш Конфедерацияси президенти Комил Рўзиев, Халқаро Кураш Ассоциацияси администрацияси раҳбари Мансур Мирзаев ҳамда бир гуруҳ мутасаддилар Душанбе шаҳрига етиб келишди.

Меҳмонларни Душанбе халқаро аэропортида Тожикистон ёшлар ва спорт давлат қўмитаси, мамлакат миллий олимпия қўмитаси, Душанбе шаҳар ҳокимлиги мутасаддилари кутиб олишди.

Шунингдек, бугун биз olamsport.com сайти ижодкорлари ҳам Душанбе шаҳрига етиб келдик ва тўрт кун давомида воқеа жойидан мусобақа тавсилотлари, фоторепортажларни тақдим этиб борамиз.